Astigarragako Txirrindulari Taldeko Ander Goikoetxea Okarizen arabera pauso garrantzitsua da, Martutene eta Loiola arteko bidegorri proiektua, «Nahiz eta gure taldeko asko errepideko txirrindulariak izan, mugikortasun jasangarriaren alde egiten dugu, eta bai bizikleta eta baita bidegorriak erabiltzeko deia egin ohi dugu. Horiek erabili ahal izateko derrigorrezkoa da bidegorri sare potente bat izatea, eta nondik nora dijoan jakitea. Gainera, jakin badakigu Hernani aldean ere egiten ari direla aldaketa batzuk, eta hemen dugun bidegorriaren jarraipena han ere egingo dela. Berri ona, dudarik gabe!». Horretaz gain, haurrekin egiten dituzten ekintzetarako ere bidegorriak izatea ezinbestekoa da: «Orain dela gutxi hasi gara haurrekin irteerak antolatzen. Lehenengoa Elorrabira egin genuen, eta ez ginen bidegorritik bakarrik joan. Horregatik da garrantzitsua bidegorri sarea, ekintza hauek aurrera ateratzeko, segurtasuna bermatzeko eta helmuga eta norabide gehiago izateko».
«Donostiara bizikletaz joaten garenean espaloitik joan behar dugu zati askotan, eta aspergarria da, jendea daukazulako aurrean eta molestatu egiten dutelako»
Txirrindulari txikiek ere badute beren hitza. Bederatzi eta hamar urteko Astigarragako Ane Etxeberria Beldarrain, Izaro Arraras Santesteban eta Ilargi Goikoetxea Suberbiolari gustatzen zaie bizikletan ibiltzea. Beraiek bakarrik dabiltzanean Astigarragan ibiltzen dira, kalean, espaloian. Baina gurasoekin edota arduradun batekin gustatzen zaie bidegorrietan zehar ibiltzea: «Donostiara bizikletaz joaten garenean espaloitik joan behar dugu zati askotan, eta aspergarria da, jendea daukazulako aurrean eta molestatu egiten dutelako» dio Ilargi Goikoetxeak, «gainera batzuetan sustoa ematen diezu, eta beraiek ere beldurtu egiten dituzu» gehitu du Izaro Arrarasek. Ane Etxeberriak ere badaki zer den hori «zu azkar joaten zarenean eta norbait aurrean dagoenean pixka bat okertu behar duzu eta beldurra ematen du horrek».
Azken batean, lege eta arau berri, joera, eta herri berdea izatea modan (oraingoan, onerako) dagoen garai honetan, mugikortasun jasangarriaren bultzada pil-pilean dagoen garai honetan, horrelako bide eta lanak oso garrantzitsuak dira, mugikortasuna jasangarriaz gain segurua ere izan dadin. Modatik modara badago alderik, ezta?