Egingo diren aldaketen artean daude espaloiei lurra ematea eta oinezkoen ibilbidean oztopoak kentzea, galtzadak estutzea eta semaforodun zebrabideak jartzea. Horietaz gain, trafikoa lasaitzeko neurriak ere hartuko dituzte inguru horretako abiadura mugak jaitsiz eta trafikoa Antzieta eta Martutene Pasealekuetatik Urumea bariantera bidaliz. Horrela, oinezkoen eta txirrindularien segurtasuna hobetu nahi dute.
Txomin eta 27. poligonoko errotonda arteko obrak probisionalak izango dira, bertan egiten ari diren lanak bukatu bitartean. Bestalde, 27. poligonotik Martutenera bitartekoak behin betikoak izango dira. Horrela, Udal bidegorri sarea (oraingoz Loiolan, kuartelaren parean amaitzen dena)eta Foru bidegorri sarea (Astigarragatik etorri eta Martutenen amaitzen dena) lotu ahal izango dira azkenean.
Proiektu honen nondik norakoak finkatzeko, besteak beste, parte hartze prozesuak egin dira, herritarrek zein behar dituzten ikusi ahal izateko. Horietan argi ikusi da Astigarragatik Donostiara joateko oinezkoek eta txirrindulariek bide hobe bat behar dutela. Beraz, jasotako informaziotik ateratako gomendio eta eskaerak aintzat hartu dituzte sustatzaileek proiektua idazterakoan, eta seguru daude egin nahi dituzten hobekuntzek bertako bizilagunen bizi kalitatea hobetzeaz gain, Donostiako zentroarekin edota inguruko herriekin garraio ez motorizatuaren bidez mugitzeko aukera haunditzen dutela.
Ingurua leuntzeko beste pauso bat
Proiektuaren helburua Txomin eta Martutene ingurua leuntzea, humanizatzea da, oinezko eta txirrindularien baldintzak hobetuz eta bide horretan garraio pribatuaren erabilera gutxituz.
Proiektu honek barne hartzen ditu Astigarragatik datorren bidegorria Txomin Enearaino luzatzea eta Donostiatik datorren 4. ibilbidea (Euskadi plaza – Loiola) edo 1. Ibilbidea (Paseo Berria - Anoeta) luzatzea, 1. ibilbidea Paseo Berria – Martutene bihurtuz. Hala, egingo den bidegorri eta pasealeku berriak 2.400 metro izango ditu Urumearen erriberatik, eta 1.760 metro Urumea pasealekutik, galtzadatik.
«Parte hartze prozesuetan argi ikusi da Astigarragatik Donostiara joateko oinezkoek eta txirrindulariek bide hobe bat behar dutela»
«Bidegorri sarea oso garrantzitsua da haurrekin egiten ditugun ekintzak aurrera ateratzeko, segurtasuna bermatzeko eta helmuga eta norabide gehiago izateko»
Txomin Eneara bai, Loiolara ez
Donostiatik datorren bidea Loiolako kuartelaren parean bukatzen da, eta egingo diren lanek ezingo dute ziklista-bidea puntu horrekin lotu lekua ez da eta egokia egin behar diren lanak egiteko: errepidea, ibaia, trenbidea… Beraz, bidegorri sare honek Txomin Eneatik Loiolara hutsune bat izango du, eta oraingoz, obrak bukatu arte itxaron beharko da zein irtenbide eskaintzen duten ikusteko. Bestalde, oraintxe ari dira Txomin Enean eraikiko den urbanizazio berriaren lehen lanak egiten, eta proiektu horren barruan ziklista-bide berriak daude. Dena den, horiek eraiki bitartean probisionalak diren bideak egingo dira.
Proiektuaren aurrekariak, Kalapiek Udalari
Loiola eta Martutene arteko ziklista-bidearen aurreproiektua Kalapie elkarteak aurkeztu zion Donostiako Udalari 2011. urtean. Udalak proposamena aztertu ondoren 2012 eta 2013. urteetan bi proiektu idatzi zituen, proposamena bi zatitan banatuz: lehenengo zatia Loiolatik 27. poligonora; eta bigarren zatia 27. poligonotik Tranbia Kalera. Proiektu hauek 2013. urtean aurkeztu ziren Donostiako Udalean. Urte horietan zehar parte hartze prozesu batzuk izan dira Martutene eta Txomin Eneako bizilagunek zein behar dituzten jakiteko. Eta hala, Kalapieren proposamenetik abiatu eta ondorengo proiektu eta parte hartze prozesuetan jaso eta idatzitakoa aintzat hartuta Donostiako Udaleko Azpiegitura eta Hirigintza zerbitzuak behin betiko proiektua idatzi zuen 2014ko martxorako. Proiektu hori da ekainaren 5ean jendaurrean aurkeztu eta datozen hilabeteetan aurrera eramango dutena.
MARTUTENE-LOIOLA ZATIA BERRITZEAK ONURA HAUEK IZANGO DITU:
l Aintzieta eta Martutene Pasealekuetan galtzadaren ezaugarriak hobetzea: ibilgailuen abiadura gutxitzea, oinezkoen eta txirrindularien segurtasuna haunditzea eta herritarren eskariei erantzutea.
l Foru eta Udal bidegorri sareari Jarraipena ematea, mendebaldetik datozen txirrindulariei Martutenera, Txomin Eneara eta 27. poligonora sarrera erraztuz. Hala ere, lotura ez da benetakoa, azken zatitxo bat falta zaio eta proiektuari: Txomin Enea eta Loiola lotuko dituena.
l Oinezkoen guneak hobetzea: espaloien zolaketa eta semaforodun zebrabideak. Bestalde, bide horretan zehar aurreikusita dauden obrak egin bitartean behin-behineko aldaketak egingo dituzte. Adibidez, Martuteneko zubia bota arte, zati hori txirrindulari eta oinezkoak pasa ahal izateko moduan utziko dute.
l Ibilgailuen abiadura gutxitzea: seinale horizontalak jartzea, galtzadak estutzea…
l Trafikoa gutxitzea Urumea Bariantera bidaliz.
l Ibilgailu ez motorizatuaren erabilpenari bultzada ematea, poligono industrialerako sarrera erraztuz.