Maiatzaren 25ean Euskal Herriaren ahotsa Europa osora zabaltzeko aukera izango dugu. Askatasuna nahi duen herri batek ezin du aukera hori alperrik galtzen utzi. Orain dela hilabete gutxi batzuk, Europako epaitegiek Parot doktrina bertan behera utzi zutenean asko jabetu ginen zein garrantzitsua den Europako borroka eremua. Egun, dispertsioaren 25. urtemuga betetzen denean aukera dugu dispertsioaren aurkako borroka Europara eramateko.
Europako mugak ikutuezinak direla esaten digutenean bidelagun ugari ditugu baieztapen hori ukatzeko. Gure lagun kataluniar, galego, eskoziar eta irlandarrekin batera erakusten ari gara Europa, edo herri libreekin eraikitzen da edo ez da Europa libre izango.
Batzuk, kapitala, enpresario eta bankuen Europan eroso sentitzen dira. Guk aldiz Europan izan nahi dugu andaluziar eta kanariar langileekin borrokan aritzeko. Guk greziar, portugaldar edo italiar langileekin aliantzak eraiki nahi ditugu. Guk Alemaniako ezker mugimenduekin Berlineko kaleak zeharkatu nahi ditugu Angela Merkel eta Troika pikutara bidaltzeko.
Herrien eta herritarren Europa eraikitzea posible da, helburu horrekin, Euskal Herritik egin daitekeen apostu sendoena Euskal Herria Bildu da.