Zero Zaborreko kideek Atez Atekoa goraipatzen badute ere, zaborra biltzeko sistema honek jarraitzen du izaten zikina, gogaikarria eta, batez ere, garestia. Bosgarren kontenedorea baino askoz ere garestiagoa da (Sasietako Mankomunitateko Teknikoek diote 6,5 aldiz garestiagoa dela). Informe berean esaten da hondakinak antzekoak direla, zabor bilketarako sistema Atez Atekoa izan edo bosgarren kontenedorea izan. Datu tekniko hauek ez dira publikoak.
Gainera, Atez Atekoaren emaitzengatik harro sentitzen direnei gogorarazi nahi dizkiet bi gauza Atez Atekoaren inguru guztia zapuzten dutenak: lehenengo, zabor turismoak jarraitu egiten duela (2010ean Hernaniko %40 desagertu zen), eta bigarren, Garbitania, Hernaniko zaborra biltzen duen enpresa, sortu zela Ezker Abertzaleak gobernatutako udalerriengatik, eta bere gobernu organoetan Bilduko karguak bakarrik daudela. Gaur, datu batzuk eskatu genituenetik urtebete baino gehiago pasa denean, ez zaizkigu iritsi. Gora gardentasuna, parte hartzea eta BLA, BLA, BLA.
Bestalde, Gipuzkoako Hiri Hondakinak kudeatzeko Plan Integrala ez betetzeko Bilduren jarrera dela-eta, eta harrobi edo kobazuloetan zabortegi berriak irekitzeko proposamena dela-eta, Hernaniko EAJk eskatu zuen Plenora eramandako mozio baten bidez, Hernaniko harrobi eta kobazuloek ez daitezela erabili zabortegi moduan. Bilduk ez zuen mozioa babestu, eta gaur, gehiengo osoa duenez, edozein momentutan gaitu ditzake gure herriko harrobia eta kobak, zabortegi kate berri horren parte izan daitezen, beren planaren arabera Gipuzkoa osoan ireki behar baitira horrelakoak.
Hainbat herritako Atez Atekoaren ezarpen-inposizioari dagokionez, argi dago ez dela kontuan izan herriaren iritzia. Atez Atekoaren lakra hau sufritu eta ordaindu behar duten 150.000 gipuzkoar daude, azaldu dutenak gutxienez erreferendum bat nahi dutela. Gogorarazi behar dut Hernanin 6.000 firmatik gora zakarretara bota zirela. Gauza bera gertatzen da beste herrietako erreferendum eta firma bilketekin.
Bilduren edo PPren gehiengo absolutuek erakutsi dute balio dietela herritarren eskariak zapaltzeko eta horrekin harro agertzeko.
Azkenik, galdera pare bat egin nahi dizkiet hernaniar guztiei gure alkateak Indiara egindako bidaiatxoa dela-eta, prozesu partehartzaileak nolakoak diren ikusteko. Ez al da oso aitzakia xelebrea lagunekin jornada ludiko-festiboak antolatzeko? Ez al litzateke ikasi behar gertuen ditugun demokrazia garatuetatik, zeintzuetara gerturatu behar genukeen?