Dibertsioaren eta atsedenaren arteko oreka

Txotx denboraldiaren hasierarekin, asko dira Hernanin, eta bereziki Kaxkoan, etorriko denaren beldur diren bizilagunak. Dibertsioaren eta atsedenaren arteko oreka da, administraziotik eskaintzen zaigun zerbait; eta zoritxarrez, urtero urtero betetzen ez dena.
Komertziante batzuk urduri daude, pentsatze hutsarekin zer topatuko duten dendaren atarian, asteburutik bueltan. Taxistek lasaiago egiten dute beraien zerbitzua, patrulla bat baldin badago Elkano eta Urbi­e­ta kaleen artean. Gaueko au­tobusen gidariak ere lasaiago daude, autobusetan kamarak jarri dituztenetik. Kaxkoko bizi­lagunak, bereziki Andrekale goikoak, beste behin jasango dute iskanbila, badakite ez za­iela errespeta­tuko atsedenerako eskubidea, kaleak zikinduko dizkiete, lurra itsaskorra aur­kituko dute, eta bakar batzuek, dagoeneko nazkatuta, etxebizitza salgai jarriko dute, bizi­tzaz aldatzeko esperantzan.
Zorionez, pixkanaka, gero eta gehiago gara, atsedenerako eskubidea eta hiri-ordena es­ka­tzen dugun talde edo norbanakoak.
Udalak, Berriakek eta Kaxko elkarteak aurreko urtean hasi zuten kanpainaren ondoren, eta bizilagunen salaketa eta protestekin, orain hitza hartu du Arartekoak, edo herriaren  defendatzailea, batzuek deitzen duten bezala; eta gaia enfokatuz nerabeen osasunaren ikuspegitik, udalerriei eskatu die kontrol haundiagoa, adingabeei alkohola sal­tzeari dagokionez. Bere ekimena txalotzen dugu, eta espero dugu, laster esango duela zerbait, bizilagun txikienetatik adinekoetara, urteak daramaz­kigunak atsedenerako eskubiderik gabe.
Manuel Lezertua Rodri­gue­zek, 2015etik Arartekoa denak, administrazioei eskatu die ba­tu eta egunez egun hobetzeko. Prebentzio neurriak hartzearen aldekoa da, konfrontaziora iri­tsi gabe. Gai hau, aspaldikoa iza­nagatik, urgente bilakatu da.
Berak dio, baita ere, adikzioen euskal legeak, iazko apirilean onartua, Udalei eslei­tzen diela ikertzeko eta zigorren ezartzeko funtzioak, udal­tzai­nen bitartez.
Bestalde, txalotzen dugu Kaxko elkartearen ekimena, aisia eta atsedenari buruzko kongresu bat antolatuz.
Badirudi bide onetik goazela, baina nahiko genuke ekimen honetan parte hartzea, modu aktiboan, gure Kaxko historikoan moz­kortuta ikusten ditugun nerabeen gu­rasoek ere.