Alderdi politikoetako ordezkarien arteko liskarra izan da azken asteotan prentsan. Giroa lasaitu arte itxaron dut zuri erantzuteko. Nik pertsonalki erantzun nahi dizut, zure lehen idatzian (Kronika, 2017/01/04) zuzenean aipa
tzen nauzulako, eta nik egindako hitzaldia aipatzen duzulako.
Ez naiz asko luzatuko, Ricardo Crespok, Alderdi Sozialistako kideak bere idatzian (Kronika, 2017/01/06) erantzuten baitizu, Jaione; eta ondo azaltzen dizu zein izan zen gobernu taldearen eskaintza legegintzaldi hasieran, eta gogorarazten dizu zuk eta zure taldeak (Orain Hernani) zein erabaki organoetan parte hartzen duzuen. Eskerrak eman nahi dizkiot Ricardo Crespori, bere azalpenarengatik eta batik bat bere zintzotasunarengatik, eta gauzak diren bezala esateagatik; hau da, egia esateagatik. Ez zuk bezala.
Parte-hartzea gobernuarentzat hitz hutsalak direla esaten duzu. Gogorarazi nahi dizut, Jaione, Hernanin baditugula parte hartzearekin lotuta hainbat foro eta erabakigune: Parekidetasun Kontseilua, Jai Batzordea, Kirol Federatuaren Batzordea, Gazte Kontseilua, Kooperazio Taldea.... eta herriko elkarteek zein herritarrek parte hartzen dutela. Ez zuk ez zure taldeak ez duzue hauetan parte hartzen. Hemendik gonbidapena berriro bertan parte har dezazun.
Azkenik, gardentasunaren inguruan esan Hernaniko Udalean lanean ari garela, pausuak ematen ari garela, eta horretan jarraituko dugula. Halere, ez dut uste, ez zu, Jaione, ezta Orain Hernani ere, zuen barruko egoera kontuan izanda, udal gobernuari tonu eta modu horretan hitz egiteko moduan zaudetenik.
Aurrerantzean ere, bai parte hartzean baita gardentasunean ere, elkarrekin hobetzeko prest gaude; baina zintzotasunez, mesedez.