AMAIA GARCIA GONZALEZ
Donostiako Zinemaldiaren 66. edizioa atzo hasi zen, El amor menos pensado pelikula argentinarrarekin. Aurtengo edizioak Hollywoodeko aktore eta zuzendariz beteko du Donostia. Besteak beste, Ryan Gosling, Lily-Rose Deep edota Bradley Cooper aktoreak egongo dira datozen egunetan Donostiako aretoetan. Horrez gain, Hirokazu Kore-eda zuzendari japoniarrak, Danny DeVito aktore estatubatuarrak eta Judi Dench aktore ingelesak, Donostia saria jasoko dute.
Aurten, Sail Ofizialean ez da egongo euskaraz egindako pelikularik, baina euskal zinemak garrantzia handia izango du, Oreina, Dantza, Margolaria edota Black is beltza pelikulak aurkeztuko direlako. Film hauek, Euskal Zinemaren Irizar Saria jasotzeko aukera izango dute; eta Ramon Agirre aktore donostiarrak Zinemira saria jasoko du, Euskal Zinemaren galan.
Gainera, Donostiako zine aretoak film oso interesgarriz beteko dira, eta mota askotako filmak ikusteko aukera izango da egun hauetan.
El reino
Irailak 22 eta 23
Rodrigo Sorogoyen zinegilearen pelikula berriak thrilller politiko bat ekarriko digu Sail Ofizialera. Manuel ustelkeria kasu batean sartuta dago, eta bere alderdi politikoaren babesik gabe geratu da. Protagonista bere egoerari aurre egiten ikusiko dugu filmean. Aktore protagonista Antonio de la Torre da, eta berarekin Barbara Lennie aktorea ere ikusiko dugu. Ez da lehenengo aldia, Sorogoyen Zinemaldiko sail ofizialean dagoena: duela bi urte Que diós nos perdone filma aurkeztu zuen, eta gidoi onenaren saria irabazi zuen.
Quién te cantará
Irailak 25, 26, 27 eta 28
Carlos Vermut zuzendariak, duela lau urte, hitzik gabe utzi zuen Zinemaldiko kritika eta publikoa, Magical Girl lanarekin. Aurten, Quién te cantará aurkeztuko du Sail Ofizialean, eta berriro ere Urrezko Maskorra irabazteko aukera izango du. Oraingoan, Vermutek abeslari baten memoria galtzearen istorioa ekarriko du lehiaketara. Torontoko zinemaldian ere aurkeztu du pelikula, eta kritika oso onak jaso ditu jada. Ikusteke dago 2014 urtean lortutakoa errepikatzeko aukera izango duen Vermutek aurten.
Roma
Irailak 26, 27, 28 eta 29
Alfonso Cuaron zuzendari mexikarrak Venezian aurkeztu berri du film hau, eta Urrezko Lehoia irabazi du, Mexiko DFko Roma auzoko emakumeen bizitza erakusten duen filmarekin. Perlas sailean ikusiko den film honek, omenaldi bat egin nahi die zuzendari mexikarra zaindu zuten emakumeei. Netflixek ekoiztutako filma da, eta agian, Zinemaldian izango da aukera bakarretarikoa, pantaila handian ikusteko.
Mudar la piel
Irailak 22, 23 eta 24
Zinemira saila ireki zuen atzo, Ana Schulz zuzendariaren dokumentalak. Juan Gutierrez, Schulzen aita, ETAren eta Espainiar gobernuaren arteko bitartekaria izan zen 80 eta 90eko hamarkadetan. Garai horietan, lagun on bat egin zuen, Roberto Flórez. Juanek ez zekiena zen, Roberto CNIko kide bat zela, eta urte batzuen ostean, traizio handi bat egingo ziola Robertok Juani. Traizio horrek eragindakoaz eta euskal gatazkaz hausnartuko du Ana Schulzek, bere gurasoekin. Horrez gain, prozesu zinematografikoaren garrantzia erakusten du zuzendariak, bere lehen lan luzean.
Oreina
Irailak 25, 26 eta 27
Zuzendari Berrien sailean aurkeztuko du Koldo Almandoz zuzendari donostiarrak, bere azken pelikula. Aurreko urteetan, bere azken lanak aurkeztu ditu Zinemaldian: 2017 urtean Plagan laburmetraia aurkeztu zuen, eta 2016an Sipo Phantasma luzemetraia. Oreina pelikulak Khalilen egunerokora gerturatuko gaitu. Khalil periferian bizi den gazte bat da, eta ahal duen bezala bizi da, ibaiaren ertzean agure batekin. Padura eta mareak ezinbestekoak izango dira maitasun, desamodio, laguntasun eta mendeku istorio honetan.
Las herederas
Irailak 22 eta 23
Paraguaytik dator, Horizontes Latinos saila zabaldu duen pelikula. Marcelo Martinessi zuzendariaren lana Paraguayko akademiak aukeratu du, Oscar sarietan atzerriko hizkuntzan egindako pelikularen sarian hautagai izan dadin. Gainera, Sebastiane Latino saria jaso zuen atzo, Chela eta Chiquitaren istorioa kontatzen duen pelikulak. Bi emakumeak ez daude bere bizitzako momentu onenean. Chiquita iruzur egiteagatik salatu dute, eta Chelak bere bizitza erosoa utzi behar du taxista moduan lan egiteko. Beraien arteko erlazioa ikusiko da film honetan, eta Paraguayko errealitatera gerturatzeko aukera izango dugu.
Shoplifters
Irailak 23, 24, 25 eta 26
Aurtengo Donostia Saria jasoko dutenen artean dago, Hirokazu Kore-eda zuzendari japoniarra. Bere lana ia urtero ikusi daiteke Zinemaldian, eta horregatik jasoko du saria. Bere azken lanak, Urrezko Palma irabazi zuen Canneseko jaialdian. Bihar, Donostia Saria jaso ostean, filma ikusteko aukera egongo da, eta baita datozen egunetan ere. Irailaren 16an, filmeko protagonista bat zendu zen. Kirin Kiki aktoreak hainbat pelikula egin ditu Kore-edarekin, eta 75 urterekin kantzerraren ondorioz hil da. Beraz, pelikula hau ikusteko hainbat arrazoi daude.