Hernani Eskubaloi Taldetik aditzera eman dute aurten ere neguko kanpusa antolatu dutela, eta apuntatzeko aukera dagoela jada. Kanpusa izango da abenduaren 28an, 29an eta 30ean; eta horrez gain, amaierako txapelketa bat jokatuko da 2027ko urtarrilaren 2an. Kanpusa zein txapelketa izango dira Hernaniko kiroldegian.
Alebin (kantxa osoa), infantil eta kadete mailako neska-mutilei dago zuzenduta, eta parte hartzaile bakoitzeko prezioa 75 eurokoa da (kamiseta bana ere eskuratuko dute prezio horren barruan). Arratsaldeko 16:00etatik 19:00etara iraungo du kanpusak, egunero, eta eskubaloian jokatzen ikasteaz gain, kanpusari amaiera emateko, abenduaren 30ean hamaiketakoa eta oparien zozketa egingo da.
Izenemateari dagokionez, aukera jada zabalik dago, eta klubeko webgunean egin behar da: hernanieskubaloia.eus. Antolatzaileek animatu dituzte herritarrak parte hartzera: «jokatu, ikasi eta bizi eskubaloia!».