Bihar hasiko da Mendizale Astea, Biteritik Lesothora bidaia eginez

Bihar hasiko da urteko aste bereziena, Mendiriz Mendi elkartearen egutegi oparoan. Mendizale Astea ospatuko dute bihartik ostiralera, iluntzero proiekzioak eta solasaldiak eskainiz Biteri kultur etxean. Eta azaroaren 15ean borobilduko dute ospakizuna, bazkideen egunarekin: Arantzan jarri dute zita aurtengoan, mendi irteera eta bazkaria egiteko.

Iluntzeko 19:30etan hasiko dira saioak astelehenetik ostegunera, eta Lesothora bidaia eginez hasiko dute astea bihar. 2024ko udazkenean bizikletaz egindako bidaia kontatuko du Igone Mariezkurrenak. Lau asteko bidaia egin zuen bizikletaz, bakarrik, 'etxea' eta material guztia gainean hartuta. Lesothon barrena ezagutu eta bizitakoak emango ditu aditzera, ordubete pasatxoko saioan.

Asteartean, berriz, eskaladaren txanda izango da. 'Harri, orri, arkatz' proiektua azalduko du Club Vasco de Campingeko Jon Herranzek, eskaladako krokisak ezagutaraztea helburu duena, hainbat eskalatzaileren eta artisten begiradaren bitartez.

Iñaki Zuza izango da hizlari asteazkenean, eta kontatuko du nolakoa den mendi gidari baten lana, Antartikako Livingston uharteko base zientifiko batean.

Eta ostegunean, azkenik, mendietako buzoiak izango ditu hizpide Iñaki Sanz-Azkuek, Iñaxio Sanz aitaren begiradatik. Euskal Herriko buzoien historiaren hastapenetatik abiatuko da, eta Hernaniko buzoien bilakaera landuko du ondoren.

Ostiralekoa, ohi bezala, gaztetxoei dominak banatu eta argazki lehiaketako irudi onenak saritzeko eguna izango da, 18:00etan hasita. Ekitaldi horretan proiektatuko dituzte gaztetxoekin egindako irteeretako zein elkartearen gainerako jardueretako irudiak.

Arantzara mendi irteera eta bazkaria, azaroaren 15ean

Bazkide egunarekin borobilduko dute Mendizale Astea, ohi bezala. Azaroaren 15ean izango da, hurrengo igandean; eta Arantzan ospatuko dute oraingoan. 12 kilometroko mendi irteera prestatu dute, eta bertan bazkalduko dute ondoren.