Perpetua Vastarda antzerki konpainiak, Hernaniko Udalaren laguntzarekin, 'Free Tour-X' antzezlana landuko du. Turismo ereduaren inguruan hausnartzeko ekintza artistikoa izango da, eta herritarren testigantzak izango ditu abiapuntu. Helburua da «turistifikazioak sortzen dituen arazoak bistaratzea eta salatzea, modu ludiko eta artistikoan». Ideia da Kaxkotik barrena egingo den antzerki ibiltari bat osatzea, 'free tour' bat parodiatuz.
Hernaniko eragileekin eta herritarrekin hiru saio egingo ditu Perpetua Vastardak, azaroan zehar. Biterin izango dira, azaroaren 10ean, 17an eta 24an (astearteak), arratsaldeko 18:00etatik 20:00etara. Dinamizatzaile bezala izango dira Nuria Hernando konpainiako zuzendari eta aktorea, eta Karla Ferreño performer hernaniarra. Bertaratzeko izena eman beharko da, azaroaren 5era bitartean, izenaeman.hernani.eus atarian.