Udako atsedenaldiaren ondoren, aste honetan helduko dio CD Hernaniko atletismo sailak 2026-2027 denboraldiari. Adin guztietako atletak hasiko dira entrenatzen, eta izenematea ere zabalik dago kide berrientzat: atletismohernani.net webguneko 'Bazkide egin' atalean; edota klubaren bulegoan (atletismo pistaren ondoan), astelehenetik ostiralera 18:30etatik 20:00etara. Orain arte klubeko atleta zirenei, automatikoki berrituko zaie fitxa, eta baja eman nahi badute, emailez jakinarazi beharko dute, atletismohernani@telefonica.net helbidera idatzita. Informazio gehiagorako, aurreko bideetara jo daiteke, edo bulegoko telefonora deitu (943 33 39 57).
Adin tarte bakoitzeko entrenamendu egunak eta tarifak ere eman dituzte aditzera. Benjaminek (2017-2018 urteetan jaiotakoek) astearte edo ostegunetan izango dituzte saioak, 18:00etatik 19:00etara; eta 16 euro ordaindu beharko dituzte hilean. Alebinek (2015-2016) astean bi entrenamendu egingo dituzte, astearte eta ostegunetan 18:00etatik 19:00etara; eta haien kasuan 20 euro izango dira hilean. Infantil mailakoen (2013-2014) saioak astelehen, asteazken eta ostiraletan izango dira, 17:45etatik 19:00etara, hilean 30 euro ordainduta. Federatuek astelehenetik ostegunera egingo dituzte entrenamenduak, 19:00etatik 20:30etara; eta 33 eurokoa izango dute hileko kuota. Eta emakume taldeak, azkenik, astelehen eta asteazkenetan egingo ditu saioak, 19:00etatik 20:00etara; haien kasuan hiru hilean behin dira 33 euro.
Atleta herrikoiek edota klubeko bazkideek, berriz, urtean 68 euroko kuota izango dute.