Gaztetxoak izango dira protagonista gaur, Portuko Jaien estreinakoan

Gaur hasiko dira Portuko Jaiak, eta urtero bezala, ez dute arratsaldera arte itxarongo martxan jartzeko. Goizetik hasita izango dituzte ekintza ugari, bereziki gaztetxoak protagonista direla. Denetik izango dute egun osoan zehar, auzoko festen estreinakoaz gozatzeko. 

Marrazki eta pintura lehiaketarekin ekingo diote; haur parkeko puzgarri, ohe elastiko eta abarretan dibertitzeko aukera izango dute ondoren, eta buruhaundien aurretik korrika ibiliko dira eguerdian, jaien hasierako suziriak botatakoan. Arratsaldean ere ez dira geldirik egongo, zaku karreretan, lokotxak biltzen edota aulki jokoan ariko baitira batera eta bestera. Txokolatadarekin borobilduko du­­te eguna.

Horren ondoren batuko dira heldu asko festara, sardinen usaiak eta Alaikiren musika doinuek erakarrita. Baina egunean zehar izango dituzte beste bi hitzordu berezi, biak ere Mikel Valdivia 'Txapete' zena omentzeko: lore eskaintza egingo diote 11:30etan, eta haren omenezko lorontzi lehiaketa egingo dute arratsaldeko 18:00etan.

Gauerdia pasata ere luzatuko da festa, baina ezingo dituzte kartutxo guztiak erre gaurkoan, are indartsuago baitatoz asteburuko bi egunak. Bihar bertan izango dira, esaterako, zinta lasterketa eta asto paseo klasikoak, jendetza erakarriko dutenak. Saskibaloi eta tiro karabina txapelketak ere izango dira goizean, eta Oier magoaren emanaldia eta pintxo-pote berezia arratsaldean. Itzal taldearen dantzaldi bikoitzak borobilduko du bigarren eguna, igandeko sagardo dastaketa, bazkari, herri kirol, bertso saio, musika eta abarren aurretik.