Joan den asteburuan bukatu dira traineru denboraldiko bi ligak, emakumezkoetan; eta bi kasuetan izan da hernaniarrik, txapeldunaren tostetan. Maila nagusian, Euskotren Ligan, Maren Etxabe herritarrak lortu du balentria, Arraun Lagunakekin, bandera guzti-guztiak irabazita. Hernaniarra 16 estropadatatik 14tan aritu da arraunean. Orain, Kontxako Banderan borobildu nahi dute denboraldi zoragarria.
ETE Ligan, berriz, Hondarribia izan da txapeldun, bi hernaniar tartean: Maider Garmendia patroi lanetan, eta Maider Perez proel edo aurrekalari gisa. Lehia oso estua izan dute Zarautzekin, eta azkeneko estropadan jokatu zuten ligako garaipena, igandean Bilbon. Bezperan zarauztarrak nagusitu ziren etxean, eta puntu bakarreko aldearekin iritsi ziren Bilbora, hondarribitarren alde. Traineru berdeak lortu zuen garaipena Ibaizabal ibaian, 10 segunduko aldearekin; eta bandera eta liga eskuratu zituen horrela. Harrera egin zieten arratsaldean, Hondarribian. Irailean jokatuko dute igoerako play offa, Bermeon eta Portugaleten, Zarautzekin eta bi traineru galiziarrekin batera.
Hernanik zazpigarren bukatu du liga, Zarautzen estropada haundia jokatuta
Hernaniko 'Maialen' traineruak ere ederki bukatu du ETE Liga. Sekulako estropada jokatu zuen larunbatean Zarautzen, eta laugarren postuan sailkatu zen, bere txanda irabazita, Isuntzarekin segundu bakarreko aldearekin; eta txanda nagusian aritu zen Kaiku ere menderatuta.
Igandean, berriz, zazpigarren izan zen Bilboko azkeneko estropadan, eta postu horretantxe bukatu du ETE Liga.
Kontxako Banderaren sailkatze estropadari begira izango dira orain, bere maila onena erakutsi eta ezusteko eder bat emateko gogotsu. Itsaso zabaleko estropadetan moldatu dira ondoen uda honetan...