Udari bukaera emateko, egun osoko irteera antolatu du Osiñagako Auzo Elkarteak, beste urte batez. Irailaren 6an egingo dute, igandearekin, eta Arabara joango dira oraingoan.
Zehazki, Gesaltza Añana bisitatuko dute auzotarrek. Goizeko 09:00etan abiatuko da autobusa Loiditik edo Bordaberritik, eta hara iritsitakoan, hamaiketakoa egingo dute, Gesaltzan bertan edo inguruetan. Ondoren, bertako gatz-bailara bisitatuko dute, eta erakutsiko diete nola egiten duten lan bertan.
Gatz-bailarako bisita bukatuta, elkarrekin bazkaltzera joango dira, eta inguruko jatetxe batean egingo dute otordua.
Izenematea, abuztuak 28 arte
Autobusaren kostua Osiñagako Auzo Elkarteak hartuko du bere gain, eta bazkaria norberak ordaindu beharko du. Joateko asmoa dutenek, lehenbailehen eman beharko dute izena, auzo elkarteko zuzendaritzako edozein kiderekin harremanetan jarrita, edo 649 493 920 (Amaia) telefonora deituta. Abuztuaren 28a izango da apuntatzeko azkeneko eguna.