Castron lehiatzea tokatzen zaio gaurkoan Hernaniko 'Maialen' traineruari, ETE Ligako 12garren jardunaldian. Pasa den asteburuan Hondarribian izan ziren, eta 6garren postuan amaitu zuten arraunlari hernaniarrek.
Mintzatu zen Jon Ocon entrenatzailea, Hondarribian egindako lanaz: «Estropada itsasoan jokatu zen, eta orokorrean, lan txukuna egin zuten neskek; lehen luzea, nahiko ona izan zen. Itzulera gure handicap txikia da; itzulerako luzeetan azken urrats bat ematea falta zaigu arraunkera aproposa lortzeko». Datorrenaren inguruan, baikor azaldu da Ocon: «Estropada hau ere itsasoan jokatuko da, eta bistan da, poliki-poliki itsasoan hobeto ari garela. Helburua da orain arte egindako lan guztia hobetzea».