'Puntaren puntan' izan da, hernaniarren eta epaimahai-kualifikatuaren botoak batuta, puntu gehien lortu dituen proiektua, kultur ekipamendu berrirako. Guztira 93 puntu lortu ditu proiektu irabazleak, Atarrabiako Transición e innovación en arquitectura e ingenieria S.L. enpresak burututakoa; bigarrena 'Kultur taupada' (Barru arquitectura S.L.P.) deritzona izan da, 88 puntu lortuta, eta hirugarrena 'Paseoa eta kultura' (Javier Fernandez Ponce) izenekoa, 80 punturekin.
1.033 boto, herritarrek
16 urtetik gorako hernaniarren artean, 1.033 izan dira haien iritzia eman dutenak. Herritarren bozkak nahiko sakabanatuta eta berdinduta egon dira; izan ere, 'Paseoa eta kultura' izan da bozkatuena herritarren artean (oro har, epaimahaiaren bozkak kontuan hartuta hirugarren bozkatuena izan dena), botoen %35,17arekin. Herritarrek bigarren gustokoena izan dutena 'Puntaren punta' da (%33), eta hirugarrena 'Kultur Taupada' (%31,83). Epaimahai profesionalak, berriz, 'Puntaren puntan' eta 'Kultur taupada' proiektuak lehenetsi zituen, eta herritarren bozka «erabakigarria» izan da bien artean aukeratzeko.
Behin betiko ebazpenaren ondoren, proiektuaren idazketa lizitatzeko prozesua hasiko du Udalak. Proiektu horretan zehaztuko dira eraikinak, bai kanpotik eta bai barrutik, izango dituen xehetasun guztiak.