Zelabide Rock Fest jaialdia izango da Hernanin datorren asteko ostiralean, uztailaren 17an. Estreinakoz ospatuko dute jaialdia Gabriel Zelaia plazako basket zelaietan, 20:15etan hasita, eta bertaratzen denak doan gozatu ahal izango du kontzertuez eta giroaz.
Lau talde izango dira musika jotzearen eta gorputzak mugiaraztearen arduradunak, eta festa gau partera arte luzatuko dutenak: Hyronika, The Kraven, Basati eta Dravernue.
Bi hernaniar, Dravernuen
Jaialdia oraindik eta erakargarriagoa egiteko, bi hernaniar ditugu Dravernue taldeko kideen artean: Raúl Gil abeslaria eta Eider Bailador teklatu jolea. Ibilbide luzea du metal melodikoko talde donostiarrak; izan ere, 2019an atera zituen lehen abestiak D.A.G.D.A. proiektuaren baitan, musika eta literatura batzen dituena: 18 abestiko albuma eta 124 orrialdeko liburua. 2025ean 'El fantasma del delirio' obra aurkeztu zuten, lau zatitan banatzen dena.