Badira hainbat hamarkada, Antziola auzoan San Kristobal jaiak ospatzeari utzi ziotela. Eta ohitura berreskuratu nahian, joan den urtean herri bazkaria antolatu zuten Antziolako Txokoko emakumeek, San Kristobal egunez. Asteroko solasaldietan garai bateko kontuez hizketan hasi, auzoko jaiez gogoratu... eta batak bestea ekarri zuen.
Etxe barrura begira antolatu zuten iazkoa, eta bazkari baten bueltan elkartu ziren haiek, lagunak eta senideak gonbidatuta, eguna ospatzeko. Baina aurtengoan, auzotar guztiei zabaldu diete San Kristobal egunean festara batzeko deia. Hori horrela, paella jate herrikoia egingo dute Antziolako eskolako aterpean, eta auzoko tabernetan jarri dituzte txartelak salgai.
14:30etatik aurrera izango da bazkaria, eta ondoren ere, martxa ederra izango dute aurtengoan. Izan ere, Isidoro eskusoinu-jolearekin dantzaldia izango dute aurrena, gorputza mugitzeko. Eta bingoa ondoren, 17:30ak aldera hasita.
Beste pausotxo bat emango dute horrela, eta urtez urte hazten joatea da asmoa: pixkanaka jai batzorde bat osatzea auzoan, Antziolako bizilagunek elkar gehiago ezagutzeko eta harremanak sendotzeko. Eta San Kristobal jaiak ez ezik, bestelako ekimenak eta jarduerak ere antolatzen hastea elkarrekin.
Bitartean, etzikoa dute hitzordua, neurri batean, historiarekin. Garai batean bezala, auzotarrak festa giroan elkartzekoa.