San Joan jaietan bete-betean, erreta agertu zen Urumea ikastolako patioan dagoen intsektuen hotela. Eskolak berak salatu duenez, ekainaren 25eko gauean gertatu zen: «Nahita erre zuten intsektuen hotela, eta horrek tristura eta haserrea eragin dizkigu, gure ikastetxeko haurren ikaskuntza, naturarekiko errespetua eta ingurumen-hezkuntza sustatzeko sortutako baliabide pedagogiko baten aurkako erasoa izan baita».
Urumea ikastolak adierazi du, horrelako ekintzek ez daukatela «lekurik gure herrian. Guztion ondarearen aurka egiteaz gain, etorkizuneko belaunaldiei transmititu nahi dizkiegun balioak zapuzten dituzte: errespetua, ardura, bizikidetza eta natura zaintzea». Nabarmendu dute, hezkuntza-komunitate baten «lana eta ilusioa» ezin direla «zapuztu» horrelako jokabideekin. Horregatik, gertatutakoa gaitzetsi dute, eta deia luzatu diete herritar guztiei, «espazio publikoak, hezkuntza-proiektuak eta guztion ondasunak zaintzeko».Ekintzaren egileei zuzendu dizkiete azkeneko hitzak: «Gonbidatzen zaituztegu hausnartzera zuen ekintzak zein ondorio izan dituen. Ez duzue egurrezko egitura bat bakarrik erre; haur askoren ikasteko aukera, ilusioa eta naturarekiko errespetua sustatzeko sortutako proiektu bat ere kaltetu duzue. Espero dugu etorkizunean guztion ondarea eta hezkuntza-ekimenak errespetuz tratatuko dituzuela».