Ohiturari jarraituz, ibiltaria izango da Gipuzkoako Batzar Nagusien uztaileko osoko bilkura, eta Hernanin egingo dute aurtengoa. Bihar bertan izango da, goizeko 11:00etan hasita, udaletxean.
Saioa hasteko, Xabier Lertxundi alkateak eta Hernaniko udalbatzak harrera egingo diete Xabier Ezeizabarrena Batzar Nagusietako lehendakariari, mahaikideei, eta baita Eider Mendoza diputatu nagusiari ere, udaletxeko atarian. Segidan, ohorezko aurreskua dantzatuko diete, eta alkateak aginte makila emango dio Ezeizabarrenari. Ondoren, elkarrekin igoko dira denak areto nagusira, eta Gipuzkoako ereserkia jo ondoren, osoko bilkurari hasiera emango diote. Alkateak eta Batzar Nagusietako lehendakariak hartuko dute hitza, eta gai bakarra landuko dute ondoren: Elgoibar izendatzea datorren urteko osoko bilkura ibiltariaren eszenatoki.