Azpeitiaren aurkako final laurdenetan sekulakoa egin ondoren, kanporaketari buelta emanez, finalerdiei ekitea tokatzen zaio Hernaniri Herriartekoan, eskuz. Eta final kutsuko kanporaketa izango da, pasa den urteko finala jokatu zuten bi taldeen artekoa baita: Hernani eta Oiartzun, hain zuzen.
Gaur jokatuko da joaneko norgehiagoka, Hernaniko frontoian, arratsaldeko 18:00etan. Garrantzi haundiko partidua denez, klubak dei egiten die herritarrei, «frontoira azaltzeko taldea animatzera».
Eta funtzionatzen duen zerbait, zertarako aldatu... Hori da klubean pentsatuko zutena, final laurdenei buelta ematea lortu zuten pelotari berdinek ekingo baitiote gaurko finalerdietako joanekoari: Oier Arsuaga eta Hegoi Zabala kadeteetan; Ekhi Oses eta Manex Alberdi jubeniletan; eta Xabi Apaolaza eta Markel Lizeaga nagusietan.