Iritsi dira azkeneko egunera, Hernaniko Olinpiadak. Bihar goizean jokatuko da 'Altxorraren bila' proba erabakigarria, 10:00etan Plazan hasita; eta 13:30ak aldera bukatuko da. Ondoren, bazkari autogestionatua egingo dute, Olinpiadei itxiera emateko; eta sari banaketa ere bihar izango da.
Proba xelebrea izango da biharkoa, sukaldari onenak sarituko baitituzte azkenerako. Talde bakoitzeko sei kide ibiliko dira herrian zehar oinez, kaja ezkutuak bilatzen. Kajetan pista bana izango dute, eta horiekin proba ezberdinak egin beharko dituzte. Probak egitean, osagai bat aukeratzeko aukera izango dute. Eta osagai horiekin zer? Beste taldekide batzuk ariko dira sukaldatzen, Elizatxon. Gainera, bonifikazioak ere izango dira ezkutatuta Elizatxon bertan.
Partehartzaileek mozorrotuta joan beharko dute, eta azkeneko proba izanik, ahalik eta jende gehien animatzeko deia egin dute. Une honetan sailkapena nola dagoen sekretupean gorde nahi izan dute, emozioa azkeneraino mantentzeko. Nor izango ote da txapelduna?
