Bihar eguerdian jokatuko da, Hernaniko kiroldegiko frontoian, Etxeko Memorialaren final haundia, Ados Pilotak antolatuta. 12:00etan hasita, Kukuprakak eta Mitxoletak taldeak ariko dira aurrez aurre, bertso-pelota torneoaren txapelen bila. Lau t'erdiko eta binakako partidu bana, eta bertsolarien saioak izango ditu finalak.
Kukuprakak taldearekin, Oskoz ariko da lau t'erdikoan, eta bera izango da faborito, orain arteko partidu guztiak irabazi baititu; baina ez du lan erraza izango Mitxoletak taldeko Agirreren kontra.
Binakakoan ere lehia bizia espero da, Aranburu-Ruiz de Larramendi (Kukuprakak) eta Iturriaga-Betegi (Mitxoletak) bikoteen artean. Eta litekeena da bertsolarien saioa erabakigarria izatea, parekotasuna hautsi eta garailea erabakitzeko, bi tanto lortuko baititu onenak. Horren ardura izango dute Maialen Akizuk (Kukuprakak) eta Nerea Elustondok (Mitxoletak).