Agenda lehiaketaz lepo izan dute Hernaniko Igeriketa Taldeko kideek, azkeneko asteotan; eta hilabete gozoa izan da joan dena, emaitza politak eskuratuta, proba ezberdinetan.
Batetik, apirilaren bukaeran jokatu zen Espainiako Ur Irekien Master Txapelketa, Ibizako Santa Eulália des Riu herrian; eta bertan aritu zen Iker Irazu Urkola. 1.500 metroko proban hartu zuen parte, eta 21garren sailkatu zen, 24:37.5 denborarekin.
Maiatzaren hasieran, berriz, Frantziako Tarbes hirian izan zen Uxue Santxo Guerrero, Gipuzkoako Federazioaren taldearekin, Nautiques lehiaketaren 33garren edizioan parte hartzen. Hiru probatan aritu zen hernaniarra, eta hiruretan lortu zuen garaipena: 50 metroko bular proban (34.81) eta 100 metroko bular proban (1:17.07), bakarka; eta baita errelebo proban ere.
Eta maiatzaren erdialdean, etxetik gertuago aritu ziren igerilari hernaniarrak, Donostiako Paco Yoldi igerilekuan: Gipuzkoako Udaberri Saria jokatu zen bertan, maila absolutuan. Klubeko bost igerilari aritu ziren bertan: Axel Etxebeste Garayar, Lur Elkoro Txintxurreta, Eñaut Zabalegi Altuna, Jurdan Zaldua Abad, eta Uxue Santxo bera.
Santxok bigarren postua lortu zuen 50 metroko (35.06) eta 100 metroko (1:18.96) bular probetan. Zaldua hirugarren sailkatu zen 200 metro libreetan (2:03.86), eta laugarren 100 metro libreetan (56.17) zein 200 metro estiloetan (2:23.12). Eta Zabalegik ere emaitza nabarmenak lortu zituen hiru bular probatan: bosgarren izan zen 100 metrokoan (1:17.40), zazpigarren 200 metrokoan (3:01.11), eta bederatzigarren 50 metrokoan (35.49).