Egunotan ari da izaten epaiketa, Donostiako Auzitegian, Lukas Agirre Izkoren erailketagatik. 2022ko abenduaren 25eko goizaldean hil zuten 24 urteko hernaniarra, labankadaz, Donostian.
Epaiketaren gastuei aurre egiteko, familiari laguntza eskaini nahi izan dio Portuko auzotar talde batek, eta ekimena jarri du martxan horretarako: 20 euroko laguntza-bonoak prestatu dituzte, eta eskuragarri jarri. Gaur iluntzean auzoko etxeetara egin zuten bisita bonoak eskaintzeko, 20:30etatik aurrera; eta bihartik Pedro Mari tabernan izango dira eskuragarri.
Laguntza-bonoarekin batera, kandela bat ere jasoko dute laguntzaileek. Kandela hori maiatzaren 31n piztuko dute, iluntzeko 21:30etatik aurrera, eta Portuko etxeetako balkoi eta leihoetan jarri. Hala egitera animatu dituzte auzotarrak, eta argazkia sare sozialetara igotzera, #justizialukasentzat traola erabiliz.
Bigarren astea beteko du epaiketak etzi
Maiatzaren 8an hasi zen epaiketa Donostiako Auzitegian, eta hiru pertsona ari dira epaitzen. 22 urteko kartzela zigorra eskatu du Gipuzkoako Fiskaltzak Lukas Agirre erail izanaren bi akusatu nagusientzat: giza hilketa leporatu diote bati, eta ezinbesteko laguntzaile izatea besteari. Hirugarren bati estaltzaile izatea leporatu diote, eta hiru urteko kartzela zigorra eskatu dute harentzat. Horrez gain, guztira 280.000 euroko kalte ordaina eskatu du fiskaltzak aurreneko biei. Zigor haundiagoak eskatu ditu Lukasen familiak, akusazio partikular gisa: 25 urteko kartzela zigorra, bi akusatu nagusientzat; eta hiru urtekoa hirugarrenarentzat.
Joan den astean deklaratu zuen Lukasen amak, eta baita lagunek ere, gertaeraren lekuko izan zirenek. Haiek adierazi dute, Lukasek ez zuela parte hartu erailketaren aurretik izan zen borrokan, eta uneoro izan zela horretatik aparte.
Bigarren astea beteko du epaiketak etzi, eta hiru asteko iraupena aurreikusi dute. Epaiketaren hasierako egunetan egin zuten agerraldia Ertzaintzaren agenteek edota forentseek, besteak beste; eta bukaera aldera dago aurreikusita akusatuek deklaratzea. Bederatzi lagunek osatutako zinpeko epaimahaiak emango du epaia.