Joan den urtean finalista izan ondoren, kanporaketa bat saihestu du Hernanik, eskuzko Herriarteko Txapelketan; eta gaur ekingo dio lehiari, final zortzirenetan: Aretxabaleta izango du kontrario, Alegi gainditzetik datorrena. Han jokatuko dute joanekoa, gaur 19:00etan hasita; eta datorren astean bueltakoa, Hernaniko kiroldegiko frontoian.
Iazko bide oparoa errepikatu nahi du Hernanik, eta plantilla zabala dauka horretarako. Ia 20 pelotariko taldea osatu du, jardunaldi bakoitzean bina aukeratzeko kadete, jubenil eta senior mailetan.