Udaberriro bezala, datorren larunbatean, maiatzaren 9an, Errapia festa ospatuko da Zikuñaga auzoko Errapia Artelekuan. 10:00etan ekingo diote festari, mural margoketarekin, 13:00ak arte iraungo duena.
Sormenerako espazioa ere izango dute gaztetxoek; izan ere, helduek murala margotzen duten bitartean, Errapien marrazkiak margotu ahal izango dituzte, eta ondoren, kartera tailerrean parte hartzeko aukera izango dute.
Halaber, 11:30etatik 13:00etara, Errapia Artelekuko ateak zabalik izango dira; horrela, interesa duen edonork bertan lan egiten duten artista, artisau, eta sortzaile ezberdinen obrak ezagutzeko aukera izango du.
14:30etan Errapiako kideek bazkaria egingo dute, eta ondoren, ospakizunari itxiera ezin hobea emateko, Ilargi taldeak kontzertua eskainiko du arratsaldean zehar, 16:00etan hasita.
Aurreko urtearekiko, soilik tradizionala eta ukiezina den mural margoketa mantendu da aurtengo egitarauan. Festa honen ezaugarrietako bat da urtero jarduera berriak antolatzea, beti artearekin eta sormenarekin lotutakoak, noski.
EGITARAUA
MAIATZAK 9, larunbata
10:00-13:00 Mural margoketa
11:30-13:00 Ate irekiak
12:00-13:00 Kartera tailerra
14:30 Errapiako kideen bazkaria
16:00 Ilargi taldearen kontzertua