40 urte beteko dira Akelarreko sorgin, adar, galtzagorri eta dultzaineroek Hernaniko kaleak lehen aldiz hartu zituztenetik. 1986ko San Joan bezperan izan zen, eta ordutik mantendu den tradizioa da: «hamaika lagunen lan eta indarrari esker urteko hitzordu garrantzitsuenetariko bat bilakatu zaigu», diote antolatzaileek.
Aurtengoa berezia izango da ondorioz, 40garren urteurrena izanik, «orain artekoa eskertu eta ospakizun egun bihurtuko dugu». Horrela, inoiz Akelarrearen parte izan den oro gonbidatu nahi du antolakuntzak, maiatzaren 7an egingo den bilera informatibora. Arratsaldeko 18:00etan izango da, Kontrakatxan.
Festetan, ezinbestekoa
San Joan bezperako arratsaldea girotzen duen ekitaldia da Akelarrea. Izatez hala da, eta gainera, San Joan suari lekukoa pasatzen dion ekitaldia ere bada. Hernaniko festetako egitarauan ezinbestekoa den emanaldia da beraz. Urtero liluratzen ditu hernaniarrak; aurtengoa berezia izango dela iragarri dute, eta ziur ez dutela hutsik egingo.