Ez zen golik izan Basauriko Kimuak ligako liderraren eta Hernaniko nesken arteko partiduan. Igandean, Basauriko Artunduaga futbol zelaian, berdeek aukera polita zuten liderrarekiko distantzia hiru puntura murrizteko. Berdindu egin zutenez, distantzia sei puntukoa da, eta hiru partidu falta dira liga amaitzeko; horrenbestez, nahiz eta oso zaila izan, hernaniarrek oraindik lehen postuan amaitu dezakete txapelketa, eta igoera lortu.
Garaipena merezi izan zuten Euskal Ligako Hernaniko neskek; izan ere, taldeko jokalari den Sara Riveroren hitzetan, pena izan zen emaitza: «Aukera gehiago izan genituen, eta argienak gure aldekoak izan ziren, baina baloia ez zen porterian sartu nahi izan».
Hala ere, beste alde batetik «liderraren etxean 0-0 gelditzeak eta horrela jokatu izanak argi uzten digu zer egiteko gai garen eta sailkapenean hor goran egotea merezi dugula».
Esan bezala, liderra sei puntura dago, eta Pauldarrak taldea bigarren jarri da sailkapenean, Hernani baino puntu bat gehiagorekin. Gauzak horrela eta hiru jardunaldi baino geratzen ez direnez, oso zaila dute berdeek zuzeneko igoera lortzea. Liderrak eta agian, arrastreak medio, bigarren sailkatuak eskuratuko lukete zuzeneko igoera.