Egun haundia izan daiteke gaurkoa, Hernaniko eskubaloiarentzat. Izan ere, Gipuzkoako lehenengo mailara igoera lortu dezakete mutil seniorrek. Play offaren finala jokatuko dute etxean, eguerdiko 12:00etan kiroldegian, Elgoibarren kontra.
Hernaniarrek Donibane menderatu zuten atzo, semifinalean, 28-22 nagusituta, aurreneko zatian lortutako abantaila baliatuz (15-7). Elgoibartarrek, berriz, Bera Beraei irabazi zioten (32-26), finalerako pasea lortzeko. Bien artean txartel bakarra dago jokoan gaurkoan, datorren denboraldian lehenengo mailan aritzeko.
Hori horrela, herritar guztien babesa eskatu dute Hernaniko Eskubaloi Taldetik, eskubaloi zale izan edo ez, partidu eta giro ederra ziurtatuta baitaude.