Indartsu ari dira lehian, asteotan, Hernaniko atletak: bai asfaltoan, eta baita mendian ere.
Asfaltoari dagokionez, joan den larunbatean jokatu zen Azkoitia-Azpeitia nazioarteko maratoi erdiaren 33garren edizioa, eta Gipuzkoako maratoi erdiko txapelketa absolutua ere izan zen jokoan bertan. Horretan hartu zuten parte, emaitza bikainekin, Ibai Alba, Gaizka Izagirre, Aitziber Martin eta Eva Esnaola hernaniarrek. Azkeneko biek, gainera, podiumera igotzea lortu zuten bere kategorian: zilarrezko domina kolkoratu zuen Martinek, eta brontzezkoa Esnaolak.
Gainera, Bartzelona Maratoian ere emaitza ederra lortzetik zetorren Esnaola: Espainiako Master Txapelketa zegoen jokoan, eta urrezko domina lortu zuen 65 urtetik gorako emakumezkoetan, 3:30:48 denborarekin.
Lur Ocon hirugarren, Bedian
Lokatz arteko lehiari dagokionez, berriz, podiumean izan zen Lur Ocon hernaniarra ere, Bedian, Kolaziñoko Mendi Lasterketan. 13 kilometroko proban hartu zuen parte, eta hirugarren sailkatu zen, 1:09:41eko denborarekin, Arnaitz Kortajarenaren (1:07:48) eta Xabier Arranzen (1:07:58) atzetik.