Kanpaina martxan jarri du Hernaniko Udalak, erabiltzaile berriak animatzeko etxean konposta egitera: «erraztasun tekniko, material eta ekonomikoak» emango dizkie, orain arte hondakin organikoa atez ate kudeatu eta beraien kabuz etxean egiten hasten diren herritarrei.
Doan emango die beharrezko materiala: konpostagailua, aireztagailua, baldea eta gida. Gainera, udal langileek montatuko dituzte konpostagailuak dagokien tokian, eta aurrez aurreko prestakuntza pertsonalizatua ere emango diete erabiltzaile berriei. Horrekin batera, onura ekonomikoak ere eskainiko dizkie Udalak, etxean konposta egiten dutenei: %40ko hobaria izango dute urteko hondakin bilketaren tasan.
Nabarmendu dute, konpostagailua jartzeko lur-zati bat nahikoa dela (lorategia, baratza, zelaia...), eta ongarria lortuko dutela horrela. Izena emateko deia luzatu die Udalak herritarrei, ondoko helbidean: labur.eus/hernani_etxekonposta. Informazio gehiagorako, idatzi daiteke hondakinak@hernani.eus helbidera edo 688 675 964 whatsappera.