Txotx denboraldian gazteentzako «gotorleku» izan nahi du Kontrakantxak. Sagardotegi tenporadak sortzen dituen «gatazken artean», gazteek ere badute zeresana. Izan ere, Gazte Asanbladak azaldu du gazteek ez dutela lasai egoteko espaziorik herrian, eta giroa «erabat» aldatzen dela hilabete luzez.
Horregatik, larunbat arratsaldeetan ekintza ezberdinak antolatzea da asanbladaren asmoa. Taldekako tribiala egingo dute gaur, eta hitzordua jarri dute: arratsaldeko 17:30etan gaztetxean. Jokoan parte hartuko dute 2-3 pertsonak osatutako taldeek: «Talderik izan ezean, lasai! Etorri eta osatuko dugu denon artean».
Gauez ere irekita mantenduko da gaztetxea, beraz, parranda egin nahi duenak ere aukera izango du. Hala jolasteko nola bertan lasai egoteko espazioa izango dela dio asanbladak: «Lagun artean egoteko, trago bat hartzeko, berriketan aritzeko eta harreman berriak eraikitzeko aukera izango da».
Sormen tailerraren bigarren saioa, asteartean
Larunbateko planaz gain, sormen tailerrak antolatzen ari da asanblada; eta astearterako ere badute plana: Zeramika tailerraren bigarren saioa egingo dute. Lehenengo saioaren balorazio «positiboa» egin dute, eta bertaratutakoak «oso gustura» egon zirenez, errepikatzea erabaki dute. Arratsaldeko 17:30etan hasiko da tailerra, Kontrakantxan.