Hernaniko autokarabana area berritzeko eta hobetzeko lanetan aritu da Udala, azkeneko hilabeteotan; eta dagoeneko bukatu dituzte obrak. Horien bitartez, urak hustutzeko gunea egokitu eta haunditu dute, eta bi plaza berri sortu dituzte arean.
Ur-zikinak hustutzeko eta ur garbia betetzeko, gune bakarra zegoen orain arte, eta bi jarri dituzte orain, lau iturrirekin: horietako bi ur garbia betetzera bideratuta, eta beste bi komuneko depositoa garbitzeko egokituta.
Arearen itxitura ere berritu dute, autokarabana gunea eta kotxeak aparkatzeko tokia bereiziz; eta arearen barruan bi plaza gehiago izango dira aurrerantzean: 35 autokarabanarentzat dago tokia orain.
Lan horiek egitera 45.589,82 euro bideratu ditu Udalak.