Hernaniko etxe hutsen jabeak bilera informatibo batera deitu ditu Udalak, gaur arratsalderako. Udaletxeko areto nagusian izango da, 18:00etan hasita.
Bertan aurkeztuko dizkiete, batetik, etxejabeentzako eta alokairurako dauden zerbitzuak; eta bestetik, aurrerantzean etxe hutsei ezarriko zaizkien neurri bereziak. Neurri horiek, hain juxtu, Hernani etxebizitza eremu tentsionatu izendatzearen ondorioz ezarriko dituzte: Ondasun Higiezinen gaineko Zergan (IBIa) %150eko errekargua eta kanona.
Zerbitzu eta programei dagokienean, azalduko dituzte etxebizitzak alokairura bideratzeko dauden aukerak eta horien abantailak: Eusko Jaurlaritzak eskaintzen dituenak, Udalak Limes inmobiliaria sozialarekin Hernanirako propio sortu duen HutsUnea egitasmoa...
Era berean, Etxebizitza Behatokia ere aurkeztuko diete, eta etxejabeei bertatik eskainiko dizkieten zerbitzuen berri eman. Etxeguraren Jabe Solidarioen Sarearen lana ere azalduko diete.
Udalak lehentasun gisa markatu du etxe hutsak merkatura ateratzea, «Hernanin lan egin eta bizi nahi dutenei aukera emateko». Izan ere, azaldu du 700 etxe huts baino gehiago daudela herrian, eta adierazi du «funtsezkoa» dela «etxejabeen partehartzea eta lankidetza, etxebizitzaren erronka sozialari erantzun eraginkorra emateko».