Aste honetako ETB1eko 'Helmuga' saioan protagonista izango dira emakumezkoen pala, oro har, eta Amaia Irazustabarrena eta Garbiñe Tijero hernaniarrak, zehazki. Bihar eskainiko dute, 11:30etan; eta bertan, emakumezkoen palari ikusgarritasun haundiagoa emateko eskaera egingo dute bi hernaniarrek: «Komunikabideak hasi ziren nesken esku pelota ematen, eta badirudi hori bakarrik egiten dugula neskek. Baina pentsa zenbat urte daramazkigun palan jokatzen. Herrietako jaietan ere, partidu pila bat jokatzen genituen, eta orain ez digute inondik deitzen».
Hernani eta Mundarro bikain, Gipuzkoako binakakoan
Mutilen lehiari dagokionez, bikain ari dira Hernani eta Mundarro, Gipuzkoako Binakakoan. Bigarren mailan, A multzoko aurreneko bi postuetan daude Mundarro (Larramendi-Goizueta) eta Hernani (Urruzmendi-Beloki), herenegun lortutako garaipenekin. Lehenengo mailan, berriz, ligaxkako laugarrena jokatuko dute Mundarroko Agirrek eta Zubiarrainek gaur, 17:00etan Txomiñenen, Lagunaken kontra. Hirutik bi irabazi dituzte orain arte.