Trantsizio Ekosozialari buruzko mahai inguru zikloa antolatu dute Hernani Burujaberen baitan, Urumea bailaran eraiki nahi dituzten instalazio eolikoen gaia lantzeko eta herritarrak sentsibilizatzeko sortu zen lantaldearen eskutik. Urtarrilaren 14an egin zuten aurreneko saioa, eta bihar izango da bigarrena, arratsaldeko 18:30etan hasita, Biterin.
Oraingoan, landuko dute «nola heldu trantsizio ekosozialaren erronkari udalerrietatik»; eta horretarako, ezagutzera emango dituzte Euskal Herriko hainbat udalerritan egin dituzten prozesuak.
Lau lagun gonbidatu dituzte biharko mahai ingurura, haienean erronka nola landu duten azalduko dutenak: Xabi Igartua, Oñatiko zinegotzia; Gurutze Etxezabal, Orexako alkatea; Aitor Ossa, Zumaiako Energia Estrategia 2020 txostenaren egilea; eta Carlos Anaut, Izabako alkatea. Aurreneko saioan bezala, Ana Galarraga Elhuyarreko zientzia dibulgatzaileak izango du mahai ingurua dinamizatzeko ardura.