Jendea nostalgiko xamar jartzen da egun hauetan. Oroitzapen asko berritzen dira gabonetako otorduen bueltan, eta jaki garestienek baino ahozapore goxoagoa uzten dute askotan. Aurtengoan, ordea, nostalgiari atea zabaltzeko beste modu bat izango da bailaran: Etzakit taldearen itzulera.
Gaur, bihar eta astelehenean eskainiko ditu Etzakitek itzulerako hiru kontzertuak, euren zale sutsuenen begiradapean. Txistu batean amaitu ziren hiru kontzertuetarako sarrerak, eta giro paregabea espero da taldearentzat hain esanguratsua den dantzalekuan.
Kontzertuak ez ezik, bestelako emanaldiak eta gonbidatuak ere izango dira Oialumen. Hiru egitarau prestatu dituzte, eta goizeko ordu txikietara arte luzatuko da festa saio guztietan.
Zuttik elektrotxarangak egingo dio harrera jendetzari
Etzakitekoak ez dira Hernaniko musikari bakarrak izango. Hiru egunetan Zuttik elektrotxaranga arduratuko da giroa berotzeaz, ateak ireki eta segituan.
Bigarren musika emanaldia, berriz, ezberdina izango da hiru egunetan. Gaurkoan DJ Bull arituko da Etzakiten ondoren, biharkoan Ezekiel DJ izango da artista eta urtarrilaren 5ean Zigor DZ.
ZERGATIK EZ? - OIALUME
GAUR
20:00 Ate irekiera,
20:30 Zuttik elektrotxaranga.
22:00 Kontzertua.
Ondoren DJ Bull.
Hiru egunetan ezberdinak izango dira bukaerako
musika emanaldiak.
BIHAR
Ezekiel DJ.
URTARRILAK 5
Zigor DZ