Intxaurrondoko kultur etxean jarriko du Nagore Legarreta hernaniarrak bere hurrengo erakusketa: 'Gorputzen errebolta', Ramon Zabalegirekin batera. Bien lanak biltzen ditu erakusketak, eta eskaintzen dute «gorputzaren eta generoaren inguruko disidentziaren irakurketa kritikoa eta emozionala», ikuslea hausnarketa egitera gonbidatuz, «ikuspegi anitzetatik». Etzidamu inauguratuko dute, abenduaren 30ean, eguerdiko 12:00etan.
Ekitaldi horretan, erakusketaren inguruko azalpenak emango dituzte, eta «soinu hizketa» ere proposatuko dute J-3Ø3 musika ekoizle eta DJak, eta Akonkagua musikari crossgenderrak. Soinua zuzenean eraikiko dute emanaldian, hainbat gailu erabiliz.
Boterea, generoa, zauria, zaurgarritasuna, indarra edota errebeldia bezalako kontzeptuak esploratzen dituzte 'Gorputzen errebolta' erakusketako lanek. «Gorputz irudikapen anitzetatik, zalantzan jartzen dituzte gure gizartean nagusi diren moduak», azaldu dute. Askotariko lanak bildu dituzte erakusketan: argazkiak, ilustrazioak, grabatuak eta beste formatu hibrido batzuk. Eskuzko sortze prozesuak baliatu dituzte bi egileek, eta ezohiko erabilera eman diete funtzio jakinetara bideratuta dauden materialei. Horrela, materialak eta haien esanahiak birziklatu dituzte: ontziekin eraikitako kamerak, tetrabrikekin sortutako grabatu plantxak, liburuak inprimatzeko metalezko xafletan inprimatutako argazkiak...
Abenduaren 30etik otsailaren 20ra egongo da erakusketa ikusgai Intxaurrondon.