Urte bukaeran galdu ezineko zita bilakatu da Hernaniko San Silbestrea herritar askorentzat, eta aurten sekulako abiadura hartu dute izenemateek: 250 lagun baino gehiago daude apuntatuta dagoeneko. RockTheSport atarian (rockthesport.com) eman daiteke izena, edota Ibai-Mendi dendan, 10 euroan. Palestinaren aldekoa izango da aurtengo San Silbestrea, CD Hernani eta Gernika Palestina Hernani taldeen elkarlanari esker.
Ohi bezala, Urte Zahar Egunez izango da lasterketa, abenduaren 31n. 17:00etan abiatuko dira korrikalariak Plazatik, eta 4 kilometroko ibilbidea osatuko dute herriko kaleetan barrena. Plazan bertan bukatuko dute proba, Kale Nagusia jai giroan zeharkatu ondoren.
Haurrentzako lasterketak ere izango dira aurretik, arratsaldeko 16:30etan hasita.