Hernanik Errege Kopako bigarren partidua jokatuko du bihar Sant Cugaten, eguerdiko 12:00etatik aurrera. B multzoko bigarren partidua izango da eta Ohorezko Elite mailako taldeen artean jokatuko den bakarra. Multzoa bost taldek osatzen dute: La Vila, El Salvador, Ciencias, Hernani eta Sant Cugat taldeek eta bakarra sailkatuko da finalerdietara, denek denen aurka jokatu eta gero.
Ohorezko Mailako hiru taldeak oso indartsuak dira eta ligaxkan irabazi daitekeen partidua biharkoa izan daiteke. Hala ere, Sant Cugat Elite mailako liderra da eta Hernanik ligan jasan duen porrot bakarra Valles Occidental bertan izan zen. Beraz, partidu zaila dute aurretik hernaniarrek.
«Partidu gogorra»
La Vilaren kontra, talde oso sendo baten aurka nahiz eta lehiatu, sentsazio gazi-gozoarekin geratu ziren hernaniarrak: «ondo bukatu genuen partidua, baina lehen zatian akats gehiegi egin genituen». Badakite Sant Cugaten aurka eta etxetik kanpo akats horiek konpondu beharko dituztela. Anartz Elosegik dioenez: «gogorra izango da. Nahiz eta jende askok pentsatu Kopa izateagatik lasaiago irtengo direla zelaira, badakigu hori ez dela horrela izango. Partidu bat jokatzerakoan %100a ematen saiatzen zara beti. Beharrezko tentsiorik gabe lesioren bat izateko aukera haunditzen da. Ahalik eta hoberen jokatzen saiatuko gara eta beraiek ere bai. Ea Sant Cugateko aurreko partiduari buelta ematen diogun, eta bertan behingoz irabazten dugun eta sentsazio onekin jarraitzen dugun Kopan».