Denboraldi hasierako sasoi puntu bikainari eusten dio Hernaniko eskubaloi taldeak, mutil seniorretan; eta Gipuzkoako bigarren mailako lider jarraitzen du A multzoan. Duela bi aste denboraldiko porrot bakarra jaso ondoren, garaipenaren bidera bueltatu ziren hernaniarrak joan den asteburuan, Legazpi 31-40 menderatuta.
Etxeko zaleen aurrean ariko dira gaurkoan, lidertza sendotzeko asmoz. Ligako 10garren jardunaldia izango da, eta Ordiziaren kontra jokatuko du Hernanik, arratsaldeko 18:00etan hasita, kiroldegian. Sailkapeneko laugarrena da talde goierritarra, jokatutako bederatzi partiduetatik hiru irabazi, bi berdindu eta lau galduta.
Gaurkoarekin, bost partidu geratzen zaizkie hernaniarrei, aurreneko fasea bukatzeko. Dena den, atseden luze bat ere izango da tartean. Bi aste barru jokatuko dute 11garren jardunaldiko partidua, eta hilabeteko etenaldia egingo dute gero, urtarrilaren 10era arte. Hernanik ia ziurtatuta dauka igoera fasera sailkatzea (multzoko lau onenak ariko dira bertan), baina oso garrantzitsua da ahalik eta garaipen gehien pilatzea, orain lortutako emaitzak kontuan hartuko direlako igoera fasean ere. Soilik beste multzoko lau onenen kontra jokatuko dituzte partiduak, bigarren fase horretan.
Igoera fasea lehenengo postuan bukatzen duen taldea zuzenean igoko da Gipuzkoako lehenengo mailara, eta bigarrenetik bosgarrenera sailkatutakoek play offa jokatuko dute.
Mundarroko eta Hernaniko nesken derbia, atzeratuta
Neska seniorretan, berriz, asteburu honetan zen jokatzekoa Mundarroren eta Hernaniren arteko derbia, Astigarragan. Baina atzeratu egin dute, arazo logistikoak direla eta.