Kooperatiba gisa 25 urteko ibilbidea egin du Mitxelenak. Urteurren borobilak beti izan dira osakizunerako aitzakia, eta ez zuten aukera alperrik galdu. Urriaren 11n enpresan bertan egin zuten festa-ekitaldia, martxan daramatzan urteetan Mitxelenaren parte izan diren langile askorekin.
'25. erreleboa. Pieza bakarrekoak gara' izan zen hautatutako leloa. Galder Gonzalez Mitxelenaren kudeatzaileak azaldu zuenez, «betiko balioei» egiten die erreferentzia esaldiak: «Kooperatiba bihurtu ginenetik azken 25 urteetan lekukoa eskuz esku pasa den bezala, belaunaldi berriek norabide berriak hartzen dituzte, baina balio berberei eutsiz eta talde izaera mantenduz».
Hain justu, belaunaldi zaharren eta berrien lotura izan zuen hizpide David Elizburu kooperatibako lehendakariak: «Belaunaldi berriei ofizioa eta balio kooperatiboak transmititzen jarraitu nahi dugu. Kooperatiba moduan, parte hartzean oinarritutako gobernantza eredua dugu: erabakiak taldean hartzen ditugu, gardentasun osoz eta konfiantza giroan».
Hitzartzeak amaitzeko, Alaitz Tolosa Garapen Estrategikoaren eta Jasangarritasunaren arduradunak etorkizunean jarri zuen begirada: «Berrikuntzan, jasangarritasunean eta komunitatearekiko konpromisoan ardaztutako geroa da gurea».
Hazkunde fasean dago Mitxelena kooperatiba
Mekanizazio haundian espezializatutako kooperatiba da Mitxelena, eta hazkunde fase betean dago une honetan. Jakinarazi dutenez, pabiloi berri bat eskuratu du azken hilabeteetan, eta «nazioartekotzea zein merkatu estrategikoetan presentzia indartzea» da euren helburua.
Mitxelenatik nabarmendu dute «lan egiteko modu propioan» oinarritzen dela gorakada: «Aholkularitza teknikoa eta koingeniaritza ditugu ardatz. Horri esker, egun, sektore estrategikoetan jarduten dugu, esperientzia eta fidagarritasuna eskainiz. Aeronautika, gasa eta petrolioa, ekipamendu zientifiko, mediko eta bioteknologikoa, prentsa, hidroa zein ongintza arloetan».