Odol emaileek asteartean egingo dituzte urteko azkeneko odol emateak Hernaniko anbulatorioan. Estrakzioak 17:00etatik 21:00etara egingo dituzte. Odola eman ahal izateko beharrezkoa da hitzordua aurretik eskatzea. Horretarako, bi modutara egin daiteke eskaera: 943 00 78 85 telefono zenbakira deituta edota gotanta.eus webgunearen bidez online hitzordua eskatuta. Azaroan 49 odol emate izan ziren eta azken hilabeteetako bolada onari eutsi diete.
Hala ere, odol ematearen aurretik, urteroko hitzordua jarri du Hernaniko Odol Emaileen Elkarteak. Ohiturari jarraituz bazkaria eta omenaldia egingo da gaur. Lehenik eta behin eguerdiko 13:30etan elkartuko dira plazan, talde argazkia egiteko; eta Tripontzi tabernara joango dira segidan, bazkaltzera eta omenduei diplomak banatzera.
Joxe Arrieta Iraola 100 estrakziora iritsi da
Ohi bezala, odol emate kopuru borobiletara iritsi diren herritarrei egingo diete omenaldia bertan. Aurtengoan, Joxe Arrieta izango da omenduen artean odol emate gehien egin dituena: 100 estrakziora iritsi da. Lorea Anabitartek, bere aldetik, 80 aldiz eman du odola dagoeneko. Guztira 19 odol emaile omenduko dira: 100, 80, 75, 60, 50, 40, 25 odol ematera iritsi direnak.