Asteartean egin zen aurreneko bilera, Sahararen aldeko 11. euskal karabana: piztu itxaropena antolatzeko. Iaz, 5 tona janari bildu ziren, duela bi urte baino gutxixeago, «baina espero baino gehiago, bizi dugun egoera kontuan hartuta».
Aurtengo kanpaina azaroaren 25etik urtarrilaren 10era bitartean egongo da martxan. Oraindik antolatzeko lanetan ari dira udaletxeko kooperazio saila eta hainbat herritar. Hurrengo bilera azaroaren 27an egingo dute, 19:30etan Biterin, eta herritarrak animatu nahi dituzte parte hartzera. Izena emateko edo informazio gehiago eskatzeko jarri harremanetan: a-yarza@hernani.net edo 943 33 70 17.
Bilketa, Biterin, eskoletan eta supermerkatuetan
Sahararrei laguntzeko produktuak hiru tokitan bilduko dira Hernanin. Ikastetxeetan, abenduaren 9tik 19ra bitartean; Biterin, abenduaren 9tik urtarrilaren 9ra; eta supermerkatuetan, abenduaren 19an eta 20an.
Jakiak eta konpresak
Euskal Herrian bi motatako produktuak bildu nahi dira. Batetik, jatekoak: arroza; lenteja, garbantzu eta antzekoak; pasta; hegaluze eta sardina latak, oliotan; eta azukrea. Azken batean, erraz eta ondo kontserbatzen diren jatekoak, bidaltzeko errazak direnak. Bestetik, garbitasunerako produktuak bilduko dira, baina, bereziki, konpresak. Izan ere, Tindoufeko errefuxiatu kanpamenduetan (Algeria) zaila izaten da horrelakoak lortzea. Diruz ere lagundu daiteke: 3035 0080 94 08000 54177 (Laboral Kutxa).