Mendizale Astea azken bi egunetara iritsiko da gaur gertukotasuna izango duen proiekzio batekin, nahiz eta ametsa kilometro askotara gauzatu. Mendiriz Mendiko kide den Julen Lekuonak aurkeztuko du, 19:30etatik aurrera Nepal eta Himalaya - Amets bat izenburupean proiekzioa.
Horretarako Larraitz Uriaren laguntza izan du Lekuonak eta bertan 2024ko maiatzean egindako bidaia kontatuko du, batez ere egindako Manasluko trekking-a. «Garrantzitsuena izan da bidaia horren zergaitia», aipatzen du Lekuonak.
Atzoko saioan Juan Mari Ansa mendizaleak, bere ikus-entzunezko eta liburuan (El Circo de Lescun, unas montañas de ensueño), inguruneko gailur garrantzitsuenetako igoerak erakutsi zituen, hala nola Anie, Hiru Erregeen Mahaia, Petrechema edo Acherito. Bestalde, bigarren atal batean, artzaintzarekin lotutako zenbait kultur gai, Le Chemin de la Mâture, Ansabère-ko orratzetara igotzearen gorabeherak edota Bigarren Mundu Gerran zehar “Passeurs”; eta iheslarien istorioak ere jorratu zituen Ansak.
Bihar itxiko da Mendizale Astea gaztetxoekin
Mendizale Astea bihar itxiko da 18:00etan hasiko den ekitaldiarekin. Bertan, Gaztetxoen irteeretako argazkien bilduma berezia ikusteko aukera izango da eta, jarraian dominak banatuko dituzte. XLVI Argazki digitalen lehiaketa eta sari banaketa ere egingo da.
Amaitzeko, ondoren, elkarteak urtean zehar egindako jardueren irudiak proiektatuko dira.