Bihar Hernaniko kiroldegian Euskadiko Kopako finala jokatuko dute, 19.30etan, Bidasoak eta Zarautzek. Helduek 3 euroko sarrera sinbolikoa ordaindu beharko dute eta jendez beteko dela kiroldegia aurreikusten da, izan ere Euskadi mailan bertako taldeen artean jokatzen den titulo gorena baita.
Hernani Eskubaloi Taldearena da finala Hernanira ekartzearen arduradun nagusia, klubetik diotenez "herri mailan kalitateko eskubaloia ikusteko dagoen eskaerari erantzun nahi diogu horrela. Eta denboraldiak aurrera egin ahala ez dugu baztertzen maila ezberdinetako lauko finalen bat herrira ekartzea, batez ere gure taldeetako bat tartean bada".
Une gozoa bizi du eskubaloiak Hernanin, 200 kirol fitxa inguru ditu HET-k eta "entrenatzaileak federazioarekin elkarlanean, etengabe prestatzen ditugu, gure taldeek behar duten arreta eta prestakuntza jaso dezaten".