Hekin Egunak jarri dituzte martxan, herrian kirola eta jarduera fisikoa zabaltzeko

Herrian jarduera fisikoa eta kirola zabaltzeko asmoz, ekimen berri bat jarri du martxan Hernaniko Udalak: Hekin Egunak (Hernaniren H+ekin). Horren baitan, kirol modalitate ezberdinetako doako saioak eta ekintzak proposatuko dituzte, hiru hilabeteko zikloetan banatuta. Bihar bertan hasiko da aurrenekoa, eta urte bukaerara bitarte luzatuko da. Horietako edozeinetan izena emateko, kiroldegiko harrerara edo bulegora jo daiteke, edota 943 55 21 85 telefonora deitu.

Helburua da «herritarrak jarduera fisikoa egitera bultzatzea, modu osasungarrian eta aktiboan, bakoitzak bere mailaren eta interesen arabera. Mila modutara ekin daiteke, bakoitzak bere neurrian, eta horixe da gure sailetik sustatu nahi duguna». Hala azaldu dute Jarduera Fisikoa eta Kirola saileko Axier Mingo zinegotziak eta Esti Aldeiturriaga teknikariak. Gainera, jarduera horien bitartez, ezagutzera eman eta balioan jarri nahi dituzte herriko baliabide naturalak eta espazio publikoak: «Askotan ez dira behar bezala baliatzen, eta ekintza hauen bitartez, herritarrei aukera eta motibazioa eman nahi diegu espazio horiek modu osasungarrian bizitzeko eta kirol ohiturak barneratzeko».

Herriko kirol elkarte eta eragileekin elkarlanean antolatuko dituzte ekintza horiek: «Guretzat, ezinbestekoa da jarduera fisikoa eta kirola ere modu komunitarioan ulertu eta lantzea», azaldu du Mingok. 

Horrela, Agerre mendi lasterketa taldearekin batera antolatu dute aurreneko Hekin Eguna, bihar bertan. Mendian korrika egiteko teknikari buruzko saioa izango da, emakumeei zuzenduta, 19:00etatik 20:00etara atletismo pistan. Datorren larunbatean, berriz, mendi lasterketako entrenamendua egingo dute Santa Barbaran, 10:00etatik 12:00etara.

Hortik aurrera, orientazio saioa, zaintza lanetan aritzen direnei begirako formazioa edota oinarrizko indar entrenamenduak izango dira, besteak beste. Aniztasuna bilatu dute, «bakoitzak bere interesen eta beharren arabera» parte hartu dezan.