Ohiturari eutsiz, abuztuko jaien ostean, Portu Eguna ospatuko dute asteburu honetan Portuko auzotarrek, auzo elkarteak antolatuta, Udalaren laguntzarekin. Biharko jarri dute hitzordua, eta eguerditik iluntzera bitarte izango da gozatzeko aukera auzoan. Festa giroan auzokideak elkartzeko eta elkarrekin ospatzeko eguna izango da.
Eguerdiko 12:00etan hasiko da egitaraua, auzotarren arteko patata tortilla txapelketarekin. Bakoitzak tortilla bere etxean egin beharko du, eguerdian denak elkartu eta lehiaketa egiteko. 13:00etan egingo dute sari banaketa, eta bi onenak sarituko dituzte: irabazlearentzat, bi lagunentzako bazkaria, Fagollaga jatetxean; eta bigarrenarentzat, beste birentzako bazkaria Tripontzi jatetxean.
Auzo bazkaria egingo dute eguerdian, eta 14:30etan jarri dute hitzordua. Horretarako, tiketak aste honetan zehar egon dira salgai. Eta arratsaldeko 18:30etan, eguna borobiltzeko, erromeriaren txanda izango da, Bide Batez taldearen eskutik. Dantza eta kantu artean amaituko dute ospakizuna.
|
PORTU EGUNA EGITARAUA BIHAR, larunbata 12:00, Auzotarren arteko patata tortilla txapelketa (etxean egin behar da tortilla). 13:00, Tortilla txapelketako irabazleen sari banaketa. 14:30, Auzo bazkaria. 18:30, Erromeria, Bide Batez taldearekin. |