Uda, askorentzat da deskonektatzeko momentua, erlaxatzekoa, bidaiatzekoa eta lasai ederrean egoteko unea. Eta askotan, batzuk plazer horiez gozatu ahal izateko, beste asko lanean izaten dira.
Urtarorik epelenean eta eguzkitsuenean hainbat lanpostu sortzen dira, eta horietako asko gazteei bideratzen zaizkie; esaterako, udalekuetako begiraleak, tabernetako edo hoteletako zerbitzariak, igerilekuetako edo hondartzetako sorosleak… Zerrenda luzea da. Eta udan lan egiten duten horietakoa dira ondorengo gazteak: Julen Beraza, Uxue Zugasti, Ana Huitzi eta Enaitz Goñi.
Hori horrela, aurtengo udako esperientziak elkarbanatu dituzte bailarako gazteek Kronikarekin.
JULEN BERAZA - MUSIKARIA
«Udan ekitaldiak ugaritu egiten dira, nire kasuan, herri ezberdinetako festetan aritzen naiz, auzoetan ere bai. Gehienbat jarduten dugu dantza taldeekin eta buruhaundi eta erraldoien konpartsekin. Horrez gain, dultzainero eta txistulari gisa ere eskaintzen ditut kontzertuak, beraz, kalejiretan ere aritzen naiz.
Aurtengo udan ibili naiz erraldoi eta buruhaundien konpartsekin, oso gustura. Ekitaldi asko kubritu ditugu. Aurten gainera, Donostiako Itzurun erraldoi eta buruhaundien konpartsarekin aritu naiz, eta sekulako esperientzia izan da. Horrek noski, suposatu dit Aste Nagusiko 8 egunetan lana egin beharra. Neketsua izan da, baina asko disfrutatu dudan lana izan da.
Hala ere, esan behar dut, udan lan egitea agian badela astunagoa, baina aukera ederrak ere badaude; adibidez, atzerrian egiten diren ekitaldietan parte hartzea, hori sekulakoa da, beste kultura batzuk ezagutzeko aukera polita!».
UXUE ZUGASTI - ARGI TEKNIKARIA
«Oso uda arraroa izan da, gehienak oporretan zeuden, eta ni, berriz, lanean. Aurreneko aldiz egin dut lan udan kontzertuetako argi teknikari bezala. Egia esan gustura egiten dudan lana da, beraz, espero dut datorren udan ere argi teknikari bezala jardutea.
Esperientzia izan da polita, eta aldi berean, gogorra. Asko ikasi dut. Uda honetan kontzertu bolada hasi zenean, nahiko larrituta ibili naiz, ez neukalako inolako esperientziarik kontzertuetan. Hala ere, gustura egon naiz. Emozionatuta ere banago datorren udarako, izan ere, uste dut asko ikasi dudala, eta hori jarri dezakedala praktikan. Hurrengo uda askoz lasaiagoa eta hobea izango dela pentsatzen dut.
Uste dut gazteak aukeratzen dituztela udako lanetan, badelako zerbait tenporala. Aldiz, urtean zehar, esperientzia izatea eskatzen dute. Nire kasuan ez da horrela izan, eta eskerrak!».
ANA HUITZI - BEGIRALEA
«Udalekutako begirale lana oso gustukoa dut. Izan ere, Lehen Hezkuntza ikasi dut, eta haurrei irakatsi, lagundu eta beraien aisialdiaren parte izatea biziki gustatzen zait!
Ezin da ahaztu lana dela, erantzukizun haundia duzula eta batzuetan urduritasun momentuak egoten direla, baina hala ere, oso lan polita da.
Haurrekin ez ezik, beste begiraleekin sozializatzeko eta ikasteko aukera duzu. Gainera, egun bakoitzak bere xarma dauka, dinamika desberdin bat dagoelako.
Udako lanetan gazteen egoerari dagokionez, iruditzen zait titulurik edota esperientziarik ez baduzu, lana egiteko aukerak ez direla oso haundiak. Ostalaritzan demanda dago, baina beste arlotan ez asko».
ENAITZ GOÑI - SOROSLEA
«Nik urte guztian zehar egiten dut lan sorosle bezala, asteburuetan. Egia da udaran lan gehiago egiten dudala, eta sorosle izateaz gain, astearteetan begirale lanak ere egiten ditut.
Gustuko dut nire lana, beraz, esango nuke bokazioz aritzen naizela udan lanean. Bertan sortzen den giroa positiboa da eta ez zait oso astuna egiten. Badaramazkit 3 urte dagoeneko, eta gustura nago, eroso!
Iruditzen zait, udara gazteak lan egiteko aukera ona dela. Badelako diru-iturri bat, gero zuk kudeatu beharrekoa, eta asko ikasi dezakezu udako lan batez. Gainera, esango nuke gazte askok aprobetxatzen dutela udara lana egiteko; nire lagunen artean, adibidez, gehienak udaran lanean ibili dira».